Ezr 6 | NdeIBE | STEP | INkosi uDariyu wasekhupha umlayo, basebephenya ezincwadini ezaziqoqwe ndawonye endlini yenotho yesizwe eBhabhiloni.

Ezra 6

Isimemezelo sikaDariyu

1 INkosi uDariyu wasekhupha umlayo, basebephenya ezincwadini ezaziqoqwe ndawonye endlini yenotho yesizwe eBhabhiloni.

2 Kwafunyanwa khona umqulu womgoqwa enqabeni yase-Ekhibhathana elizweni laseMediya kulotshwe lokhu kuwo:

Umbhalo wesimiso:

3 Ngomnyaka wokuqala weNkosi uKhurosi, inkosi yakhupha isimemezelo mayelana lethempeli likaNkulunkulu eJerusalema: Ithempeli kalakhiwe kutsha libe yindawo yokwenzela imihlatshelo, njalo izisekelo zalo kazibekwe. Kalibe yizingalo ezingamatshumi ayisithupha ukuphakama, ububanzi bube yizingalo ezingamatshumi ayisithupha, 4 kwakhiwe imizila emithathu yamatshe amakhulu lomzila owodwa wezigodo. Izindleko zonke zizabhadalwa yisikhwama sesikhosini. 5 Akuthi njalo izimpahla zegolide lesiliva uNebhukhadinezari azithatha ethempelini eJerusalema waziletha eBhabhiloni zibuyiselwe ezindaweni zazo ethempelini eJerusalema; zimele zibekwe endlini kaNkulunkulu.

6 Ngakho-ke wena Thathenayi, mbusi wangaphetsheya kweYufrathe, loShethari-Bhozenayi labaphathisi benu bakulowo ummango, sukani lapho. 7 Lingaphazamisi umsebenzi wethempeli lelo likaNkulunkulu. Yekelani umbusi wabaJuda labadala babaJuda bayakhe kutsha indlu kaNkulunkulu endaweni yayo.

8 Njalo sengimisa umlayo walokho okumele lina likwenzele abadala laba bamaJuda ekwakhiweni kwendlu kaNkulunkulu: Izindleko zala amadoda zizabhadalwa ngokugcweleyo yisikhwama senkosi, kuthathwa emithelweni yangaphetsheya kweYufrathe ukuze umsebenzi ungaze wema. 9 Loba yini efunekayo – amajongosi, izinqama, amazinyane amaduna aweminikelo yokutshiswa kuNkulunkulu wezulu, lengqoloyi, itshwayi, iwayini lamafutha okuyabe kucelwe ngabaphristi eJerusalema – kabakuphiwe nsuku zonke kungaphuthi, 10 ukuze benze imihlatshelo ethokozisayo kuNkulunkulu wezulu njalo bathandazele impilakahle yenkosi lamadodana ayo.

11 Phezu kwalokho ngibeka umthetho othi nxa ekhona ozaguqula lesisimiso, kakuhwatshwe uthungo endlini yakhe aphakanyiswe axhonxwe kulo. Akuthi ngenxa yalelicala indlu yakhe ibhidlizwe ibe liquba. 12 Sengathi uNkulunkulu owenza ukuthi iBizo lakhe lihlale khona, angayichitha loba yiyiphi inkosi loba ngabantu abaphakamisa isandla sabo ukuguqula umlayo lo loba ukudiliza ithempeli leli eliseJerusalema. Mina Dariyu ngiwumisile umthetho lo. Kawulandelwe ngokukhuthala.

Ukuqedwa Lokunikelwa kweThempeli

13 Kwathi-ke, ngenxa yomthetho iNkosi uDariyu eyase iwuthumele, uThathenayi umbusi wangaphetsheya kweYufrathe, loShethari-Bhozenayi labasekeli babo bakwenza lokho ngenkuthalo. 14 Yikho-ke abadala bamaJuda baqhubeka ngokwakha bephumelela betshunyayezwa nguHagayi umphrofethi loZekhariya, umzukulu ka-Ido. Baqeda ukulakha ithempeli belandela umlayo kaNkulunkulu ka-Israyeli kanye lezimiso zikaKhurosi, loDariyu lo-Athakisekisi, amakhosi asePhesiya. 15 Ithempeli laqedwa ngelanga lesithathu lenyanga u-Adari, ngomnyaka wesithupha wokubusa kweNkosi uDariyu.

16 Kwasekusithi abantu bako-Israyeli – abaphristi, labaLevi labo bonke ababethunjiwe – benza umkhosi.

17 Ukunikela indlu kaNkulunkulu le bapha umnikelo wezinkunzi ezilikhulu, izinqama ezingamakhulu amabili, amazinyane amaduna angamakhulu amane njalo lezimpongo ezilitshumi lambili njengomnikelo wesono ka-Israyeli wonke. 18 Njalo bagcoba abaphristi ezigabeni zabo labaLevi ngamaxuku abo ukwenza umsebenzi kaNkulunkulu eJerusalema, njengokulotshiweyo eNcwadini kaMosi.

IPhasika

19 Ngelanga letshumi lane lenyanga yokuqala, izithunjwa zagubha umkhosi wePhasika.

20 Abaphristi labaLevi babezihlambulule behlanzekile ngokomkhuba. AbaLevi balihlaba izinyane lePhasika elabo bonke ababethunjiwe, labafowabo abaphristi njalo bezihlabela labo ngokwabo.

21 Ngakho abako-Israyeli ababebuyile ebugqilini balidla, kanye labo bonke labo abasebezikhuphile emikhutsheni engcolileyo yabomakhelwana beZizwe ukuze badinge uJehova, uNkulunkulu ka-Israyeli. 22 Bawugubha uMkhosi weSinkwa esingelaMvubelo okwezinsuku eziyisikhombisa bethokoza, ngokuba uJehova wayebagcwalise ngokuthokoza ngokuguqula ingqondo yenkosi yase-Asiriya ukuthi ibancedise emsebenzini wendlu kaNkulunkulu, uNkulunkulu ka-Israyeli.